Nigeriyada masjidga qilingan hujum oqibatida 30 kishi halok bo‘ldi

Nigeriyaning Katsina shtatidagi masjidga qilingan qurolli hujum qurbonlari soni 30 kishiga yetdi, deb ma’lum qildi Malumfashi okrugi deputati Aminu Ibrohim.  

Uning so‘zlariga ko‘ra, Mantau rayonidagi masjidga bomdod namozi vaqtida qurolli to‘da a’zolari hujum uyushtirgan. 

Ibrohimning ta’kidlashicha, shtatning turli hududlarida masjidlarga hujumlar amalga oshirilmoqda.  

U parlament va shtat hukumatini aholini himoya qilish uchun xavfsizlik kuchlarini joylashtirishga chaqirdi.  

Nigeriyada qurolli to‘dalar, xususan, ISWAP va “Boko Haram” kabi terrorchi tashkilotlar xavfi haligacha yuqori darajada saqlanib turibdi.