Ukraina TIV: Zelenskiy Putin bilan hududlar masalasini muhokama qilishga tayyor

Ukraina tashqi ishlar vazirining birinchi o‘rinbosari Sergey Kislitsaning so‘zlariga ko‘ra, Zelenskiy Ukraina qonunchiligi va jamoatchilik fikriga muvofiq ish ko‘radi.

Foto: AFP/Getty

Ukraina prezidenti Volodimir Zelenskiy Rossiya prezidenti Vladimir Putin bilan uchrashuvda hududlar masalasini muhokama qilishga tayyor. Bu haqda Ukraina tashqi ishlar vazirining birinchi o‘rinbosari Sergey Kislitsa NBC News telekanaliga bergan intervyusida ma’lum qildi.

Uning so‘zlariga ko‘ra, Zelenskiy Ukraina qonunchiligi va jamoatchilik fikriga muvofiq ish ko‘radi. Kislitsaning ta’kidlashicha, Ukraina jamoatchiligi «tinchlik evaziga hududlarni berishga mutlaqo qarshi».

«Prezident Zelenskiy prezident Putin bilan buni muhokama qilishga tayyorligini yaqqol tushuntirdi deb o‘ylayman»,— dedi u.

Avvalroq AQSh davlat kotibi Marko Rubio Ukraina ham, Rossiya ham tinchlik bitimi tuzish uchun yon berishiga to‘g‘ri kelishini aytgandi.

#Ukraina #Volodimir Zelenskiy