Россия ҳам, Украина ҳам ён бериши керак бўлади – Рубио

Украина ҳам, Россия ҳам тинчлик битими тузиш учун ён беришига тўғри келади, деди АҚШ давлат котиби Марко Рубио Оқ уйда Доналд Трамп, Володимир Зеленский ва Европа давлатлари етакчиларининг учрашувидан сўнг Fox News телеканалига.

Уруш ёки ҳар қандай можарони тугатишга қаратилган ҳар қандай музокараларда ҳар икки томон нафақат олиши, балки бериши ҳам керак, деб таъкидлади Рубио.

«Ҳар бир томон бироз ён беришига тўғри келади. Ва, шубҳасиз, ер масаласи ёки бу чегараларни қаерга ўтказишингиз - уруш қаерда тугаши - бу суҳбатнинг бир қисми бўлади», деди у.

«Аслида, томонларнинг ҳеч бири бу ерда 100 фоизга эга бўлмайди», деб таъкидлади Рубио ва бу «осон эмас», эҳтимол «адолатсиз» эканини, аммо фақат шу йўл билан урушга чек қўйиш мумкинлигини қўшимча қилди.

АҚШ давлат котибининг таъкидлашича, уруш қандай шартлар асосида тугашини Украина ва Россия ҳал қилади, Қўшма Штатларнинг роли эса муҳокамани имконли қилиш ва «ҳар икки томон ҳам музокара ўтказаётганига ишонч ҳосил қилиш»дан иборат.

АҚШ президенти Доналд Трамп 18 август оқшомида Оқ уйда Украина президенти Володимир Зеленский ва Европа етакчилари билан учрашди. 15 август куни Трамп Аляскада Россия президенти Владимир Путин билан алоҳида музокаралар ўтказди.

Трампнинг Путин билан ҳам, Зеленский билан ҳам музокаралари тафсилотлари расман маълум қилинмаган. Америка матбуотига кўра, Путин Украина бутун Донбассни, жумладан, Киев назоратидаги ҳудудларни Россияга топшириши кераклигини айтган. Украина президенти аввал бир неча бор мамлакатнинг бирор қисмидан воз кечиш мумкин эмаслигини айтган эди.

Оқ уйдаги учрашувдан сўнг Трамп Путиннинг Зеленский билан учрашувига тайёргарлик кўришни бошлаганини айтди.