Tramp yevropaliklarni Ukrainadagi urushni moliyalashtirishda aybladi

AQSh prezidenti Donald Tramp 4 sentabr kuni Yevropa yetakchilari bilan videokonferensiya chog‘ida ularni Rossiya neftini sotib olish orqali Ukrainadagi «urushni moliyalashtirayotganlikda» aybladi va Moskvani ushbu daromad manbayidan uzib qo‘yishga, shuningdek, bu borada Xitoyga bosim o‘tkazishga chaqirdi. Bu haqda Amerikaning Axios internet nashri va CNN telekanali Oq uydagi manbaga tayanib, 5 sentabr, jumaga o‘tar kechasi xabar berdi.

CNN'ning aniqlik kiritishicha, Trampning izohlari Ukrainani Rossiyaga qarshi mudofaa urushida qo‘llab-quvvatlashni davom ettirish niyatida bo‘lgan bir qator Yevropa davlatlari, shuningdek, Ukraina prezidenti Volodimir Zelenskiy ishtirokidagi «ko‘ngillilar koalitsiyasi» muzokaralari chog‘ida bildirilgan. Fransiya prezidenti Emmanuel Makron va boshqa Yevropa yetakchilari Trampdan ushbu videokonferensiyaga qo‘shilishni so‘radi, deyiladi xabarda.

Axios jurnalistlarining eslatishicha, Ukrainada keng miqyosli urush boshlanganidan keyin Yevropa davlatlari Rossiyadan energiya sotib olishni keskin qisqartirgan. Biroq tahririyatning Oq uydagi manbasiga ko‘ra, «bir yil ichida Rossiya Yevropa Ittifoqidan yonilg‘i sotish orqali 1,1 milliard yevro olgan».