Kubaning energetika sohasi AQSh sanksiyalari nishoniga aylandi

AQSh davlat kotibi Marko Rubio 11 iyun kuni mazkur choralar haqida ma’lum qildi. Uning ta’kidlashicha, Kuba hukumati energetika sohasidan aholi ustidan nazorat o‘rnatish va o‘z manfaatlarini ta’minlash vositasi sifatida foydalanmoqda.

Yangi qarorga muvofiq, CUPET kompaniyasi AQShning maxsus sanksiyalar ro‘yxatiga kiritildi. Endi AQSh fuqarolari va kompaniyalariga mazkur tashkilot bilan har qanday tijorat munosabatlarini o‘rnatish taqiqlanadi.

Amerika Moliya vazirligi ma’lumotiga ko‘ra, CUPET bilan hamkorlik qiluvchi xorijiy shaxslar va tashkilotlar ham ikkilamchi sanksiyalar xavfiga duch kelishi mumkin.

Vashington bosimni davom ettirmoqchi

Marko Rubioning bildirishicha, Kuba xalqi ko‘proq iqtisodiy va siyosiy erkinliklarga erishmagunicha AQSh kommunistik rejimning energetika savdosidan foydalanish imkoniyatlarini cheklash siyosatida davom etadi.

U Vashington Kuba rahbariyatining korrupsiyaviy manfaatlari va aholiga nisbatan bosim siyosatiga qarshi kurashish uchun iqtisodiy choralarni kuchaytirishini ta’kidladi.

Bir hafta avval Kuba rahbariyatiga qarshi ham sanksiyalar kiritilgan edi

Bu AQShning so‘nggi kunlarda Kubaga qarshi qabul qilgan birinchi cheklovi emas.

4 iyun kuni Vashington Kuba prezidenti Migel Dias-Kanel hamda sobiq rahbar Raul Kastroning bir qator yaqin qarindoshlariga qarshi iqtisodiy sanksiyalar joriy qilgan edi.

Yangi cheklovlar prezidentning turmush o‘rtog‘i va o‘gay o‘g‘liga, shuningdek Raul Kastroning farzandlari va nabiralaridan ayrimlariga ham tatbiq etildi.

95 yoshli Raul Kastro rasman davlat lavozimlarini egallamasa-da, mamlakat siyosiy hayotida muhim ta’sirga ega shaxs sifatida qaraladi.

Kubada iqtisodiy inqiroz chuqurlashmoqda

So‘nggi oylarda AQSh va Kuba o‘rtasidagi munosabatlar yanada keskinlashdi. Kuba rasmiylari Vashingtonni orol davlatiga qarshi bosim va tahdidlarni kuchaytirishda ayblamoqda.

1962 yildan beri AQSh iqtisodiy embargosi ostida yashab kelayotgan Kuba hozirda SSSR parchalanganidan keyingi eng og‘ir iqtisodiy inqirozlardan birini boshdan kechirmoqda. Mamlakatda elektr energiyasi uzilishlari, yonilg‘i tanqisligi va iqtisodiy qiyinchiliklar kuchaygan.

Vaziyatga Venesueladan neft yetkazib berish hajmining qisqarishi ham ta’sir qilgan. Ilgari Kubaning asosiy energetik hamkori hisoblangan Karakas bilan aloqalar zaiflashishi oroldagi energetik muammolarni yanada kuchaytirgan.

Tahlilchilar fikricha, yangi sanksiyalar Kuba iqtisodiyotiga qo‘shimcha bosim o‘tkazishi va mamlakatning yonilg‘i ta’minoti bilan bog‘liq muammolarini yanada og‘irlashtirishi mumkin.