Qoraqalpog‘istonda yo‘lovchi poyezd yuk mashinasi bilan to‘qnashdi

Poyezdda 216 nafar yo‘lovchi bo‘lgan. Ularga jarohat yetmagan. Yuk mashinasi haydovchisi esa shifoxonaga jo‘natilgan. Bu so‘nggi 2 oyda Qoraqalpog‘istonda yo‘lovchi poyezdning yuk mashinasi bilan to‘qnashgan ikkinchi holati.

Foto: Videodan kadr

Qoraqalpog‘istonda yo‘lovchi poyezd yuk mashinasi bilan to‘qnashdi. Holat yuzasidan “O‘zbekiston temir yo‘llari” AJ axborot xizmati izoh berdi.

Ma’lum qilinishicha, hodisa bugun, 6 oktyabr kuni soat 15:31 da To‘rtko‘l va Ellikqal’a stansiyalari o‘rtasidagi 531-kilometrda joylashgan qo‘riqlanmaydigan temiryo‘l kesishmasida sodir bo‘lgan. “Qo‘ng‘irot ‒ Andijon” yo‘nalishidagi 128-sonli yo‘lovchi poyezdi “KamAZ” rusumli yuk mashinasi bilan to‘qnashib ketgan. Yuk mashinasi temiryo‘l kesishma signal belgilariga qaramasdan harakatlangan.

Mashina haydovchisi shifoxonaga jo‘natilgan. Yo‘lovchi poyezdida 216 nafar yo‘lovchi bo‘lib, ularning sog‘lig‘iga zarar yetmagan. Teplovoz poyezdni olib ketolmasligi sababli O‘zTE16M2 rusumli 025 sonli teplovoz soat 16:15 da voqea joyiga jo‘natilgan.

Hodisa joyiga tegishli rahbarlar va huquqni himoya qilish organlari xodimlari yetib borgan. Hozirda surishtiruv ishlari davom etmoqda.

Oldinroq ham Qoraqalpog‘istonda “Qo‘ng‘irot ‒ Andijon” yo‘nalishidagi poyezd “KamAZ” bilan to‘qnashgan, buning oqibatida teplovoz relsdan chiqib ketgandi.