FIA Bosh assambleyasi yig‘ilishi ilk bor Toshkentda o‘tkaziladi

O‘zbekistonning Jyenevadagi elchisi Ravshan Usmonov FIA boshqarma boshlig‘i Jonatan Refoy bilan uchrashuv o‘tkazdi. Bu haqda "Dunyo" axborot agentligi xabar berdi.

Uchrashuv davomida Jonatan Refoy FIA faoliyati, shuningdek, O‘zbekiston bilan hamkorlik istiqbollari haqida ma’lumot berdi. Uning so‘zlariga ko‘ra, joriy yil 10–12 dekabr kunlari Toshkent shahrida FIA Bosh assambleyasining navbatdagi yig‘ilishi bo‘lib o‘tadi.

Yig‘ilish doirasida yo‘l harakati xavfsizligi, avtomobil standartlari, ekologik barqarorlik, shaharlarda tirbandliklarni kamaytirish va elektr hamda gibrid avtomobillarni ommalashtirish masalalari muhokama qilinishi rejalashtirilgan. Shuningdek, bu yo‘nalishlarda manfaatdor idoralar bilan hamkorlikni yo‘lga qo‘yishga tayyorlik bildirildi.

Ma’lumot uchun: FIA — 1904 yili Parijda tashkil etilgan xalqaro tashkilot bo‘lib, jahon avtosportini muvofiqlashtiradi, avtomobil xavfsizligini ta’minlash va madaniyatini rivojlantirishga xizmat qiladi. Tashkilotning bosh qarorgohi Parijda, boshqaruv ofisi Londonda, moliya bo‘limi esa Jyenevada joylashgan.