Ilon Mask Vikipediyaning muqobili Grokipediyani ishga tushirdi

Ilon Maskning xAI kompaniyasi Grokipedia onlayn ensiklopediyasini ishga tushirdi, milliarder uni Vikipediyaga nisbatan «keng ko‘lamli yaxshilanish» deb atadi. Xizmat beta-sinov bosqichida: hozircha maqolalar faqat ingliz tilida va rasmlarsiz mavjud. Bu haqda The Verge xabar berdi.

Ishga tushirilgan paytda Grokipediyada taxminan 885 ming maqola bo‘lib, bu Vikipediyadagi taxminan yetti million inglizcha maqoladan ancha kam. Sayt dizayni minimalistik: bosh sahifa qidiruv satridan iborat bo‘lib, materiallar sarlavhalar, kichik sarlavhalar va manbalarga havolalar bilan matn shaklida bezatilgan.

Barcha materiallar Grok chatboti yordamida «tekshirilgani» ta’kidlanmoqda. Foydalanuvchilar hali maqolalarni to‘g‘ridan-to‘g‘ri tahrirlay olmaydi - tahrirlash tugmasi faqat ba’zi sahifalarda paydo bo‘ladi va u yerda faqat mualliflarni ko‘rsatmasdan allaqachon kiritilgan o‘zgarishlarni ko‘rish mumkin. Mask «Grok va Grokipediyaning maqsadi haqiqat, faqat haqiqat va haqiqatdan boshqa hech narsa emas» deb va’da berdi.

Biroq Grokipedia kontentining bir qismi Vikipediyadan deyarli so‘zma-so‘z ko‘chirilgani ma’lum bo‘ldi - masalan, MacBook Air va PlayStation 5 haqidagi maqolalar. Bunday sahifalarning pastki qismida Kontent Creative Commons Attribution-ShareAlike 4.0 litsenziyasi asosida Vikipediyadan olingan deb ko‘rsatilgan. Wikimedia Foundation vakili Loren Dikinson bunga shunday izoh berdi: «Hatto Grokipediya ham mavjud bo‘lishi uchun Vikipediyaga muhtoj».