Strategik tuzilmalar yangilandi: prezident huzurida yangi kengash va agentlik

Farmonga ko‘ra, quyidagi qayta tashkil etish choralari amalga oshirildi:

• Tahliliy va tadqiqot tuzilmalari faoliyatini tashkil qilish bo‘yicha muvofiqlashtiruvchi kengash — O‘zbekiston prezidenti huzuridagi Strategik rejalashtirish va rivojlanish bo‘yicha muvofiqlashtiruvchi kengash etib qayta tashkil etildi;
• prezident huzuridagi Strategik islohotlar agentligi — O‘zbekiston prezidenti huzuridagi Strategik rivojlanish va islohotlar agentligi etib qayta tashkil etildi.
• Strategik islohotlar agentligini qo‘llab-quvvatlash jamg‘armasi — prezident huzuridagi Strategik rivojlanish va islohotlar agentligini qo‘llab-quvvatlash jamg‘armasi etib qayta tashkil etildi.

Muvofiqlashtiruvchi kengashning maqomi va vazifalari:

• kengash vazirlik va idoralar, shuningdek mahalliy ijro etuvchi hokimiyat organlarining strategik rejalashtirish sohasidagi faoliyatini muvofiqlashtiradigan idoralararo kollegial organ hisoblanadi;
• kengash 1- va 2-darajali strategik hujjatlar loyihalarini (konsepsiyalar va strategiyalar) ularni qabul qilishning maqsadga muvofiqligi nuqtai nazaridan ko‘rib chiqadi.

Ma’qullangan loyihalar keyingi tartibda Prezidentga kiritiladi.

PF–201 bilan 2025 yil 1 noyabrdan strategik rejalashtirishning uch bosqichli iyerarxiyasi — konsepsiya (7+ yil, qonun bilan), strategiya (4–7 yil, prezident hujjatlari bilan), dastur (1–3 yil, prezident/Vazirlar Mahkamasi qarorlari bilan) — amaliyotga joriy etilgan edi. Yangilangan tuzilmalar ushbu zanjirni uyg‘unlashtirish, monitoring va baholashni kuchaytirishga xizmat qiladi.