Tish rangiga eng ko‘p ta’sir ko‘rsatuvchi mahsulotlar aytildi

Pomidor, choy, qahva, rezavorlar va meva sharbatlaridagi bo‘yovchi moddalar tish emali rangiga kuchli ta’sir ko‘rsatadi. Bu haqda britaniyalik stomatolog Hanna Kinsella  Daily Mail nashriga bergan intervyusida aytdi. 

Uning so‘zlariga ko‘ra, pomidor, rezavorlar va sharbatlarda turli kislotalar miqdori yuqori bo‘ladi. Ular tish emalini yemiradi va mayda yoriqchalar paydo bo‘lishiga olib keladi.  

«Pomidorda antosian va tanin pigmentlari ko‘p bo‘ladi. U tish emaliga tez yopishadi va tish rangini o‘zgartiradi», — dedi Kinsella.

Stomatologning aytishicha, malina va qorag‘at hamda choy va qahva tarkibida kuchli bo‘yovchi moddalar mavjud. U shuningdek, sharbatlar, ayniqsa, apelsin va anor sharbatlarini kamroq ichishni tavsiya qildi.  

«Choy va qahva taninga boy. Tanin o‘simliklarga sariq va jigarrang tus beradi. U tish emalini qoraytiradi. Choy va qahvadan butkul voz kechishning imkoni yo‘q, ammo ularga sut qo‘shib ichish tishda dog‘lar paydo bo‘lishining oldini oladi», — dedi u.