Slovakiyada poyezdlar to‘qnashdi: o‘nlab odam jarohatlandi

9 noyabr kechqurun Slovakiya g‘arbida sodir bo‘lgan ikki yo‘lovchi poyezdi to‘qnashuvida o‘nlab odam jabrlandi. Bu halokat oqibatida vafot etganlar yo‘q, 11 kishi kasalxonaga olib borildi. Qolgan jabrlanuvchilar faqat yengil ko‘karish va jarohatlar olgan.

Ma’lum qilinishicha, hodisa poytaxtdan taxminan 20 km shimolda, Sveti-Yur va Penzinok shaharlari orasida ro‘y bergan. Koshitsedan Bratislavaga harakatlanayotgan Tatran 620 poyezdi Nitra shahridan Bratislaga yo‘l olgan REX1814 poyezdi bilan to‘qnashgan. Poyezdlarda jami taxminan 800 yo‘lovchi bo‘lgan.

Politsiya ma’lumotiga ko‘ra, poyezdlar yuzma yuz to‘qnashmagan, shuningdek, relsdan chiqib ketish holati ham kuzatilmagan. Reuters agentligi xabariga qaraganda, poyezdlardan biri ikkinchisining orqa qismiga urilgan.

Hodisaga izoh berar ekan, Slovakiya prezidenti Peter Pellegrini barcha jabrlanuvchilarga tez fursatda shifo tilab, qutqaruv xizmatlariga tezkor ishlashi uchun minnatdorlik bildirdi.