Ukrainada "Energoatom" ishi fonida davlat kompaniyalari tekshiriladi

Ukraina hukumati mamlakatdagi eng yirik davlat korxonalarini, xususan energetika va mudofaa sanoati sohasidagi korxonalarni tekshirishni topshirdi. Bu haqda 13 noyabr kuni Ukraina bosh vaziri Yuliya Sviridenko ma’lum qildi. Ayniqsa, xaridlarning oshkoraligi va moliyaviy nazorat masalalariga alohida e’tibor qaratiladi.

Sviridenkoning so‘zlariga ko‘ra, «Naftogaz», «Ukroboronprom», «Ukrzaliznitsa», «Ukrgidroenergo» va davlat banklarining kuzatuv kengashlari kompaniyalarning ijroiya organlari faoliyatini tahlil qilishi, qoidabuzarliklar aniqlansa, nazoratni kuchaytirishi va vazirlar mahkamasini xabardor qilishi kerak.

Shu bilan birga, Ukraina Davlat audit xizmati ham davlat sektoridagi yirik korxonalarni, jumladan, budjet mablag‘laridan samarali foydalanish va moliyaviy hisobotning ishonchliligi yuzasidan tekshiruvdan o‘tkazadi, deya ta’kidladi bosh vazir.

«Gs operatory» rahbari lavozimiga tanlovni to‘xtatish to‘g‘risidagi qaror Ukraina Milliy antikorrupsiya byurosi (NABU) tomonidan «Energoatom»dagi ehtimoliy suiiste’molliklar bo‘yicha olib borilayotgan tergov bilan bog‘liq, bu ishda tanlov finalchilaridan biri ham tilga olingan. «Tanlov ishtirokchilarining halolligi qo‘shimcha tekshirilgandan so‘ng qayta tiklanadi», — deb yozdi Sviridenko o‘zining Telegram-kanalida. OAV ma’lumotlariga ko‘ra, gap Ukraina energetika va adliya ishlari bo‘yicha sobiq vazir German Galushchenkoning sobiq maslahatchisi Oksana Krivenko haqida ketmoqda, u Ukrainaning gaz transport tizimi rahbari lavozimiga asosiy da’vogar hisoblangan.

NABU va Maxsus antikorrupsiya prokuraturasi (SAP) 10 noyabr kuni «Energoatom» energetika sohasidagi davlat kompaniyasi atrofidagi korrupsiya sxemasi fosh etilganini ma’lum qildi. Mojaro markazida Ukraina amaldagi hukumati ayrim vazirlari va mamlakat prezidenti Volodimir Zelenskiyning ko‘p yillik hamkori, «Kvartal 95» studiyasining egasi Timur Mindich qolgan.