Braziliyaning sobiq prezidenti Jair Bolsonaru hibsga olindi

Braziliya Oliy sudi davlat to‘ntarishini tayyorlashda ayblanib, 27 yillik qamoq jazosiga hukm qilingan sobiq prezident Jair Bolsonaruni hibsga olishga qaror qildi, deb xabar berdi Associated Press sobiq prezident yordamchisi Andriyeli Chirinoga tayanib.

Bolsonaru avgust oyidan beri uy qamog‘ida edi. Yordamchining so‘zlariga ko‘ra, u bugun ertalab hibsga olingan va Braziliyadagi federal politsiya bosh qarorgohiga olib ketilgan.

Sud qarorida hibsga olish «sobiq prezidentning qadr-qimmatiga to‘liq hurmat bilan, kishansiz va ommaviy axborot vositalarida e’lon qilinmasdan amalga oshirilishi kerakligi» ko‘rsatilgan.

Bolsonaruning advokati Reuters nashriga hibsga olish sabablarini tushuntirmadi. Vaziyatdan xabardor manba uni uy qamog‘i shartlari buzilgani uchun «profilaktik chora» deb atadi.

Prokuratura ma’lumotlariga ko‘ra, sobiq prezident saylovda o‘z raqibi, amaldagi prezident Luis Inasiu Lula da Silvaga xalaqit berishga uringan.