Toshkentda yo‘llarni ifloslagan yuk mashinalari bo‘yicha reydlar kuchaytirildi

Ma’lum qilinishicha, yuk tashish faoliyati bilan shug‘ullanuvchi haydovchilar bilan yuk tashish qoidalari, ortilgan yukning ustki qismi qay tarzda yopilishi shartlari yuzasidan targ‘ibot va tashviqot ishlari muntazam ravishda olib borilmoqda.

Shunga qaramay, ayrim yuk tashish transport vositalari haydovchilari tomonidan belgilangan talablarga rioya etilmasligi natijasida poytaxt ko‘chalarining ifloslanishi, yo‘l qoplamasining loy va chiqindilar bilan qoplanishi holatlari kuzatilmoqda. Bu esa fuqarolarning haqli e’tiroziga sabab bo‘lmoqda.

Toshkent shahar IIBB YHXB axborotiga ko‘ra, yuk tashish qoidalarini buzgan, ortilgan yuk ustini to‘g‘ri yopmasdan harakatlangan haydovchilarga nisbatan MJtKning 125¹-moddasi va 147-moddalariga muvofiq ma’muriy bayonnomalar rasmiylashtirilmoqda.

Qonunchilikka ko‘ra, MJtKning 147-moddasida yo‘l qoplamasini ifloslantirish, shuningdek yo‘llarni saqlash qoidalarini buzish fuqarolarga – bazaviy hisoblash miqdorining ikki baravari, mansabdor shaxslarga – bazaviy hisoblash miqdorining o‘n baravari miqdorida jarima solishga sabab bo‘lishi belgilangan.

Yo‘l harakati xavfsizligi xizmati yuk tashuvchilardan belgilangan me’yor va qoidalarga qat’iy rioya qilishni, yukni to‘g‘ri mustahkamlash va ustini yopish orqali yo‘llar hamda shahar muhitiga zarar yetkazmaslikni so‘ramoqda.