Rossiya yana Ukrainaga dronlar va raketalar bilan hujum qildi

Rossiya qo‘shinlari 6 dekabrga o‘tar kechasi dronlar va raketalar bilan Ukraina hududlari bo‘ylab yopirilma zarba yo‘lladi. Kiyev oblastida Fastovdagi temiryo‘l vokzali vayron bo‘lgan, shuningdek, Vishgorod va Novi Petrivsi zarbalar ostida qolgan. Oblast ma’muriyati rahbari Mikola Kalashnikning ma’lumotiga ko‘ra, uch kishi jarohatlangan.

Dniproda Rossiya dronlari hujumi oqibatida bir necha bino yonib ketdi, deb yozgan telegram-kanalida Dnipropetrovsk oblasti rahbari Vyacheslav Gayvanenko.

Lutskda rossiyalik harbiylar hujumidan keyin oziq-ovqat mahsulotlari ombori yonib ketdi, deb xabar berdi shahar meri Igor Polishchuk. Shaharning bir qismi elektr ta’minotisiz qolgan. Rossiya zarbalari tufayli Lviv va Odessa oblastlarida ham elektr ta’minotida uzilishlar yuzaga kelgan.

Chernihiv oblastida va oblast markazida energetika infratuzilmalari obektlariga hujum qilingan.

Ukraina qurolli kuchlari havo kuchlari qo‘mondonligiga ko‘ra, Rossiya qo‘shini Ukrainaga jami turli tipdagi 51 raketa va 653 ta dron (jumladan, imitator dronlar ham) uchirgan.

RF mudofaa vazirligi zarbalar «Ukraina harbiy-sanoat kompleksi korxonalari hamda ularning faoliyatini ta’minlovchi energetika obektlari, shuningdek, Ukraina qurolli kuchlari manfaatlari uchun foydalaniladigan port infratuzilmalari» bo‘ylab yo‘llangani haqida bayonot bergan.

Ukraina prezidenti Volodimir Zelenskiy yangi hujum haqida gapirarkan, Rossiya xristianlar uchun muhim bayram vaqtida zarba berganiga urg‘u qaratgan. «Rossiyaliklarning maqsadi – millionlab ukrainlarni ranjitish, ular shu qadar pastlashdiki, Avliyo Mikola kunida tinch shaharlarga raketa uchirmoqda», – deb yozgan Zelenskiy Rossiyaga bosimni kuchaytirishga chaqirib.