Kiyev Trampning tinchlik rejasi bo‘yicha AQShga rasmiy javob yo‘lladi

Ukraina chorshanba kuni, 10 dekabrda, Rossiya boshlab bergan urushni to‘xtatishga qaratilgan tinchlik rejasining so‘nggi loyihasi bo‘yicha AQSh ma’muriyatiga batafsil javob yubordi. Bu haqda Axios nashriga Ukraina va AQSh rasmiylari ma’lumot bergan. "RBK-Ukraina" agentligi esa ushbu ma’lumotni xabardor manba orqali tasdiqlagan.

Axios’ning ma’lum qilishicha, Ukraina Milliy xavfsizlik va mudofaa kengashi kotibi Rustem Umerov, AQSh bilan muzokaralarda Ukraina delegatsiyasiga rahbarlik qilar ekan, rasmiy javobni — undagi izohlar va taklif etilgan tahrirlar bilan birga — AQSh prezidenti Donald Trampning kuyovi va maslahatchisi Jared Kushnerga yuborgan.

Bir necha kun davomida asosan Buyuk Britaniya, Fransiya va Germaniya kabi Yevropadagi ittifoqchilari bilan maslahatlashuvlar o‘tkazganidan so‘ng, ukrainalik muzokarachilar hududlar to‘g‘risidagi masalalar va Rossiya qo‘shinlari tomonidan egallab olingan Zaporijjya AES maqomi yuzasidan muammolarni hal qilish bo‘yicha yangi g‘oyalarni bayon etgan.

Volodimir Zelenskiy o‘zining har kungi videomurojaatida ma’lum qilishicha, 20 banddan iborat tinchlik rejasi asosida AQSh bilan o‘zaro munosabatlarga oid yana ikki hujjat ustida ish olib borilmoqda: biri — AQSh tomonidan xavfsizlik kafolatlari haqida, ikkinchisi esa Ukraina tiklanishi va qo‘shma investitsiyalar haqida. Ukraina prezidentining so‘zlariga ko‘ra, 10 dekabr kuni "Ukrainani tiklash va iqtisodiy yuksalishi bo‘yicha hujjat ustida ishlaydigan guruhning birinchi amaliy uchrashuvi bo‘lib o‘tdi".

Amerika tomonidan ushbu uchrashuvda Jared Kushner, AQSh moliya vaziri Skott Bessent hamda dunyodagi eng yirik investitsiya kompaniyalaridan biri — BlackRock rahbari Larri Fink ishtirok etdi.

Axios’ning yozishicha, 11 dekabr kuni AQSh va Ukrainadan yuqori martabali harbiy amaldorlar AQShning tinchlik rejasi muhokamasini davom ettirish maqsadida virtual yig‘ilish o‘tkazishi kutilmoqda.