Germaniya Mariya Kolesnikova va Viktor Babarikoni qabul qiladi

Germaniya IIV rahbari Dobrindt Berlin Belarus demokratik harakatini qo‘llab-quvvatlashdan hali ham manfaatdor ekanini aytdi, shuning uchun ozod etilgan ikki belarus siyosatchisi - Kolesnikova va Babarikoni “hatto bugunning o‘zida” qabul qilishini bildirdi.

Foto: DW

Germaniya ozod etilgan belarus muxolifati vakillari Mariya Kolesnikova va Viktor Babarikoni qabul qiladi. Germaniya Federativ Respublikasi hukumati Belarus demokratik harakati Belarusdan tashqarida rivojlanishga majbur bo‘lsa ham, uning yanada mustahkamlanishidan juda manfaatdor, dedi yakshanba kuni, 14 dekabrda Germaniya ichki ishlar vaziri Aleksander Dobrindt ARD jamoat-huquqiy telekanali efirida.

«Shuning uchun biz hatto bugunning o‘zida qamoqda bo‘lgan ikki nufuzli muxolif siyosatchini qabul qilamiz», — deya tushuntirdi nemis vaziri. Qaysi shaxslar haqida gap ketayotgani aniqlashtirilganda, Germaniya IIV rahbari bu Mariya Kolesnikova va Viktor Babariko ekanini aytdi — «ular demokratik harakatda katta rol o‘ynagan».

Belarus hokimiyati 13 dekabr kuni 123 kishi qamoqdan ozod etilganini e’lon qildi — bu Belarus rahbari Aleksandr Lukashenko va AQSh delegatsiyasi o‘rtasida ikki kun davom etgan muzokaralardan keyin sodir bo‘lgan.

Ozodlikka chiqqanlar orasida Nobel mukofoti sohibi Ales Belyatskiy, belaruslik jurnalist Marina Zolotova, adabiyotshunos va siyosiy tahlilchi Aleksandr Feduta ham bor. Belarusda ozod etilgan siyosiy mahbuslarning 114 nafari Ukrainaga, 9 nafari esa Litvaga yetkazilgan.