O‘zbekiston fuqarolarini Germaniya mehnat bozoriga jalb etish kengaytiriladi

Frankfurt-Mayn Savdo-sanoat palatasida bo‘lib o‘tgan muloqotda Germaniyaning yirik xizmat ko‘rsatish kompaniyalaridan biri — WISAG rahbariyati, palata vakillari hamda O‘zbekiston tomonidan Migratsiya agentligi va diplomatik korpus vakillari ishtirok etdi.

Uchrashuv davomida O‘zbekistonda kadrlarni Germaniya mehnat bozori talablari asosida tayyorlash, nemis tiliga o‘qitish va fuqarolarni tashkiliy tarzda ishga joylashtirish bo‘yicha amalga oshirilayotgan ishlar haqida ma’lumot berildi.

WISAG kompaniyasi vakillari Germaniyada faoliyat yuritayotgan o‘zbekistonlik mutaxassislarning kasbiy mahorati, mehnat intizomi va mas’uliyatini yuqori baholab, hamkorlikni yanada kengaytirishdan manfaatdor ekanliklarini bildirdilar.

Muzokaralarda Germaniya vizasini rasmiylashtirish jarayonining uzoq davom etayotgani mehnat migratsiyasi sur’atiga salbiy ta’sir ko‘rsatayotgani ham qayd etildi. Nemis tomoni mazkur muammoni o‘rganib chiqish va uni bartaraf etish bo‘yicha tegishli choralarni ko‘rishga tayyor ekanini ma’lum qildi.

Uchrashuv yakunlari bo‘yicha nemis tilini o‘zlashtirgan o‘zbekistonlik mutaxassislar haqidagi ma’lumotlarni Germaniyadagi ish beruvchilarga taqdim etish hamda mehnat sohasidagi hamkorlikni yanada kengaytirish yuzasidan dastlabki kelishuvlarga erishildi.