Hindistonda ifloslangan ichimlik suvi tufayli 9 kishi vafot etdi

Indor shahrining Bhagiratpura hududida aholi bir necha kun davomida quvurdan kelayotgan suvning sifati yomonlashgani — hidi og‘ir va ko‘rinishi iflos ekani haqida shikoyat qilgan. The Guardian manbasiga ko‘ra, shikoyatlar uzoq vaqt e’tiborsiz qolgan, keyin esa odamlar ommaviy ravishda isitma, qusish va ich ketishi alomatlari bilan shifoxonalarga tusha boshlagan. 

Reuters xabar qilishicha, shaharning bosh tibbiy amaldori Madhav Prasad Hasani ichimlik suvi quvuridagi sizib chiqish tufayli ifloslanish bo‘lgani, tahlillarda esa bakteriyalar aniqlanganini aytgan. Rasmiylar “ifloslanishga olib kelgan bo‘lishi mumkin bo‘lgan” nuqta topilgani va u tuzatilganini bildirgan. 

The Indian Express tergov ma’lumotlariga tayanilgan holda, ichimlik suvi magistrali ustida septik baksiz qurilgan jamoat hojatxonasi kanalizatsiya chiqindilarining quvurga aralashishiga sharoit yaratgan bo‘lishi mumkinligini yozdi. Shu ish bo‘yicha ayrim mas’ullar lavozimidan chetlatilgani ham qayd etilgan. 

Hodisa faqat raqamlar emas — u odamlarning kundalik hayotini ham vayron qildi. NDTV’ning yozishicha, 70 yoshli Urmila Yadavning oila a’zolari uning ahvoli aynan shu suvni ichganidan keyin og‘irlashganini aytadi. Uning 11 oylik nabirasi ham kasal bo‘lgan, keyinroq shifoxonadan chiqarilgan. Oila shifolanish xarajatlari va rasmiylar e’tibori yetishmaganini ta’kidlagan. 

Reuters ma’lumotiga ko‘ra, hokimiyat uyma-uy skrining o‘tkazib, minglab odamlarni tekshirgan, aholiga suvni tozalash uchun xlor tabletkalari tarqatgan, alomatlari yengil bo‘lganlar ham ro‘yxatga olinayotganini bildirgan. 

Shu bilan birga, o‘lim soni bo‘yicha turli raqamlar aytilmoqda: Reuters “kamida 9” deb keltirsa, The Guardian ayrim rasmiy bayonotlarga tayanilgan holda “kamida 10” degan ma’lumotni yozgan, mahalliy OAVda bundan yuqoriroq raqamlar ham tilga olinadi, ammo ular rasman tasdiqlanmagan.