Germaniya IIV rahbari: Kiyev YeIga erkaklar oqimini qisqartirishi kerak

Berlin Kiyevdan ukrain qonunchiligi shunday tarzda o‘zgartirilishini kutmoqdaki, natijada Ukrainadan YeIga kelayotgan yosh erkak migrantlar oqimi sezilarli darajada qisqarsin. Bu haqda Germaniya ichki ishlar vaziri Aleksander Dobrindt 7 yanvar, chorshanba kuni DW’ga bergan intervyusida ma’lum qildi.

“Biz Ukrainaga qonunchilikda o‘zgarishlar bo‘lishini va Ukraina yosh erkaklar Yevropaga, Yevropa Ittifoqiga ko‘chib keta olmasligi uchun chora ko‘rishini kutyapmiz, deb aniq-ravshan bildirganmiz. Hech bo‘lmasa, bu o‘tgan yili mumkin bo‘lganidek tarzda bo‘lmasin. Aytgancha, bundan Ukrainaning o‘zi ham manfaatdor bo‘lishi kerak”, — deya ta’kidladi GFR IIV rahbari.

Dobrindt qo‘shimcha qilishicha, Kiyev bu masalaga “juda jiddiy munosabatda” va bu mavzu muhokama qilinmoqda, biroq hozircha natija yo‘q.

Aleksander Dobrindt ta’kidlashicha, yangi boshlangan yilda GFR hukumati migratsiya siyosatida qattiq yo‘l tutishni rejalashtirmoqda — bunda maqsad noqonuniy migrantlar uchun Germaniyaning jozibadorligini kamaytirish va shu orqali butun Yevropa bo‘yicha bosimni pasaytirish. Uning so‘zlariga ko‘ra, bu borada Germaniyani migrantlar uchun “magnit”ga aylantirgan “joziba omillari” (pull factors)ni qisqartirish muhim o‘rin tutadi.

Jumladan, ukrainlar uchun GFRda Bürgergeld (fuqarolik nafaqasi) to‘lovlari allaqachon pastroq — boshpana so‘rovchilarga beriladigan nafaqa bilan almashtirilgan. Shuningdek, ijtimoiy to‘lovlarni olishda hisobga olinmaydigan aktivlar (mulk/mablag‘) hajmi ham kamaytirilgan.

Dobrindt qayd etishicha, 2026 yilda Yevropa Ittifoqida boshpana berishning yangi umumevropa tizimi ishga tushishi kerak. Bundan tashqari, Germaniya va “uning qarashlarini bo‘lishadigan” boshqa YeI davlatlari hozir uchinchi mamlakatlarda YeIda qolish huquqi rad etilgan migrantlar uchun maxsus deportatsiya markazlarini tashkil etish ustida ish olib bormoqda.

Shu bilan birga, GFR IIV rahbari aytganidek, integratsiya qilishga, ishlashga va o‘zini o‘zi ta’minlashga intilgan chet elliklar uchun “Germaniyada istiqbol bor”. Integratsiyadan bosh tortadiganlar esa o‘z kelajagi — o‘z vatanida ekanini anglab yetishi kerak, deya ta’kidladi Aleksander Dobrindt.