Германия ИИВ раҳбари: Киев ЕИга эркаклар оқимини қисқартириши керак

Берлин Киевдан украин қонунчилиги шундай тарзда ўзгартирилишини кутмоқдаки, натижада Украинадан ЕИга келаётган ёш эркак мигрантлар оқими сезиларли даражада қисқарсин. Бу ҳақда Германия ички ишлар вазири Александер Добриндт 7 январ, чоршанба куни DW’га берган интервюсида маълум қилди.

“Биз Украинага қонунчиликда ўзгаришлар бўлишини ва Украина ёш эркаклар Европага, Европа Иттифоқига кўчиб кета олмаслиги учун чора кўришини кутяпмиз, деб аниқ-равшан билдирганмиз. Ҳеч бўлмаса, бу ўтган йили мумкин бўлганидек тарзда бўлмасин. Айтганча, бундан Украинанинг ўзи ҳам манфаатдор бўлиши керак”, — дея таъкидлади ГФР ИИВ раҳбари.

Добриндт қўшимча қилишича, Киев бу масалага “жуда жиддий муносабатда” ва бу мавзу муҳокама қилинмоқда, бироқ ҳозирча натижа йўқ.

Александер Добриндт таъкидлашича, янги бошланган йилда ГФР ҳукумати миграция сиёсатида қаттиқ йўл тутишни режалаштирмоқда — бунда мақсад ноқонуний мигрантлар учун Германиянинг жозибадорлигини камайтириш ва шу орқали бутун Европа бўйича босимни пасайтириш. Унинг сўзларига кўра, бу борада Германияни мигрантлар учун “магнит”га айлантирган “жозиба омиллари” (pull factors)ни қисқартириш муҳим ўрин тутади.

Жумладан, украинлар учун ГФРда Bürgergeld (фуқаролик нафақаси) тўловлари аллақачон пастроқ — бошпана сўровчиларга бериладиган нафақа билан алмаштирилган. Шунингдек, ижтимоий тўловларни олишда ҳисобга олинмайдиган активлар (мулк/маблағ) ҳажми ҳам камайтирилган.

Добриндт қайд этишича, 2026 йилда Европа Иттифоқида бошпана беришнинг янги умумевропа тизими ишга тушиши керак. Бундан ташқари, Германия ва “унинг қарашларини бўлишадиган” бошқа ЕИ давлатлари ҳозир учинчи мамлакатларда ЕИда қолиш ҳуқуқи рад этилган мигрантлар учун махсус депортация марказларини ташкил этиш устида иш олиб бормоқда.

Шу билан бирга, ГФР ИИВ раҳбари айтганидек, интеграция қилишга, ишлашга ва ўзини ўзи таъминлашга интилган чет элликлар учун “Германияда истиқбол бор”. Интеграциядан бош тортадиганлар эса ўз келажаги — ўз ватанида эканини англаб етиши керак, дея таъкидлади Александер Добриндт.