Toshkentda kuchli ta’sir qiluvchi dorilarning noqonuniy savdosi fosh etildi

Bosh prokuratura huzuridagi Departamentning Yangihayot tumani bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda kuchli ta’sir qiluvchi dori vositalari savdosi bilan shug‘ullanib kelgan fuqaro D.U. fosh etildi.

Ma’lum qilinishicha, fuqaro D.U. Shayxontohur tumanidagi Uchlola ko‘chasida joylashgan xonadonda Nervismart nomli kuchli ta’sir qiluvchi dori vositasining 12 600 donasini sotish maqsadida saqlab kelayotgani aniqlangan. Mazkur dori vositalari ashyoviy dalil sifatida olingan.

Shuningdek, Departamentning Uchtepa tumani bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda fuqaro A.A. Uchtepa tumani Beshqayrag‘och ko‘chasidagi xonadonda 65 dona kuchli ta’sir qiluvchi dori vositalarini sotish maqsadida saqlab kelayotgani ma’lum bo‘lgan. Ushbu vositalar ham ashyoviy dalil sifatida rasmiylashtirib olindi.

Qayd etilishicha, mazkur holatlar yuzasidan O‘zbekiston Jinoyat kodeksining 251-1-moddasi bilan jinoyat ishlari qo‘zg‘atilib, hozirda tergov harakatlari olib borilmoqda.