«Mening maktabim» loyihasida ovoz berish bosqichi boshlandi

«Mening maktabim» loyihasining 2025/2026 o‘quv yilidagi 2-bosqichi doirasida ovoz berish bosqichi boshlandi.  

Iqtisodiyot va moliya vazirligi axborot xizmatining ma’lum qilishicha, ovoz berish bosqichi 11 yanvardan 20 yanvar soat 23:59 ga qadar davom etadi.

2025 yil 15–24 dekabr kunlari loyihalar shakllantirilgan, 25 dekabrdan 10 yanvargacha esa saralab olindi.

«Mening maktabim» loyihasida 5-sinfdan 11-sinfgacha bo‘lgan har bir o‘quvchi o‘zi ta’lim olayotgan umumta’lim maktabiga doir loyihalarni ilgari surishi hamda ushbu loyihalarga ovoz berishi mumkin.

O‘quvchilar «Ochiq budjet» portali orqali quyidagi usullardan foydalangan holda o‘z loyihalarini ilgari surishi mumkin:

- avtomatik tarzda — loyiha namunalari orasidan o‘ziga yoqqan loyihani tanlash orqali;

- mustaqil ravishda — taqdim etilgan loyiha namunalari orasida mavjud bo‘lmagan loyihalarni yangidan shakllantirish orqali.