Rossiya kechasi Kiyev va Xarkivdagi energiya obektlariga yana zarba berdi

Rossiya qo‘shinlari 24 yanvar, shanbaga o‘tar kechasi Ukrainani yana raketa va dronlar bilan ommaviy ravishda nishonga oldi. Ukraina hukumatlari va qutqaruv xizmatlari xabarlariga ko‘ra, asosiy zarba Kiyevga qaratilgan bo‘lib, RF yana muhim infratuzilma obektlarini nishonga olgan.

Kiyev shahar hokimi Vitaliy Klichko Dnipro daryosi chap sohilida issiqlik va suv ta’minotida uzilishlar borligini ma’lum qildi. Shuningdek, dastlabki ma’lumotlarga ko‘ra, shaharning kamida besh tumanida — Desnyan, Dnipro, Darnitskiy, Goloseyev va Solomen tumanlarida dron parchalari tushishi oqibatida turli hodisalar ro‘y bergan. Ayrim joylarda yong‘in chiqqan, ammo katta vayronagarchilik qayd etilmagan.

Kamida bir kishi halok bo‘lgani va to‘rt kishi yaralangani haqida xabar berilmoqda. Ertalabgacha shaharda havo hujumi xavfi rejimi saqlanib qolgan.

Xarkiv shahar hokimi Igor Terexovning bildirishicha, shahar qariyb ikki yarim soat davomida dronlar hujumiga uchragan. Xarkiv tomon kamida 25 ta dron uchirilgan, ammo barchasi urib tushirilganmi-yo‘qmi — bu haqda u aniq aytmagan.

Zarba berilgan obektlar orasida bir nechta tumanlardagi ko‘p qavatli uylar, xususiy sektordagi binolar, mahalliy shifoxona va tug‘ruqxona bor. Terexov, shuningdek, ichki ko‘chirilganlar yashaydigan yotoqxonaga dron urilganini alohida ta’kidladi.

“Yaralanganlar bor. Bugun tunda uyidan ayrilganlar bor”, — dedi u.

Faqat yanvar oyining o‘zida Rossiya Ukrainaga kamida uch marta ommaviy hujum uyushtirgan bo‘lib, natijada mamlakat bo‘ylab shaharlarda issiqlik, elektr va suv ta’minotida jiddiy muammolar kelib chiqqan.

9 yanvar kungi birinchi yirik hujumdan keyin faqat Kiyevning o‘zida 6000 dan ortiq ko‘p qavatli uy — ya’ni uy-joylarning yarmidan ziyodi issiqliksiz qolgan. Bu holat fonida shahar hokimi Klichko fuqarolarni “muqobil issiqlik va elektr manbalari bor joylarga, shahar tashqarisiga chiqib turishga” chaqirgan edi.

20 yanvarga o‘tar kechasi RF yana Kiyevdagi energetika obektlariga zarba berdi. Klichkoning aytishicha, 9 yanvardagi hujumdan keyin barcha uylarga ham issiqlik yetkazib berish tiklanmagan. Yangi hujum oqibati ham deyarli shunga teng bo‘ldi — 5635 ta ko‘p qavatli uy issiqliksiz qoldi. Vaziyatni yanada og‘irlashtirayotgan omil — ob-havo: yanvar oyi davomida Kiyevda kuchli sovuqlar kuzatilib, harorat −17°S gacha tushgan.

Rossiya Mudofaa vazirligi Ukraina energetika obektlariga zarba berayotganini tan oladi, ammo bunday hujumlar maqsadi “mamlakatning harbiy-sanoat majmuasi faoliyatini izdan chiqarish” ekanini ta’kidlaydi. Kreml ham to‘liq urush davomida qish oylarida Ukraina energetikasi nishonga olinayotganini yashirmagan: prezident matbuot kotibi Dmitriy Peskovning aytishicha, tinch aholi issiqliksiz qolishi — Kiyevning go‘yoki “muzokaralar olib borishni istamasligi oqibati”.

https://www.dw.com/ru/rossia-nocu-vnov-atakovala-energoobekty-v-kieve-i-harkove/a-75635335