Xitoyda nishonni aniq uradigan miltiqli dron sinovdan o‘tkazildi

Xitoyda 100 metr masofadan nishonni aniq uradigan miltiq o‘rnatilgan dron sinovdan o‘tkazildi, deb xabar berdi South China Morning Post gazetasi.

"Xitoyning maxsus operatsiyalar uchun mo‘ljallangan yangi uchuvchisiz qurilmasi sinov vaqtida inson kattaligidagi nishonni piyodalar vintovkasidan bexato urib ajoyib natija ko‘rsatdi", - deyiladi nashr xabarida.

Gazetaning aniqlik kiritishicha, dron Wuhan Guide Infrared kompaniyasi va Xitoy quruqlik qo‘shinlari maxsus operatsiyalar akademiyasi hamkorligida ishlab chiqilgan.

Qayd etilishicha, uning boshqa dronlardan farq qiladigan jihati shundaki, qurilmaga oddiy miltiq o‘rnatilishi mumkin.

Sinov vaqtida dron 10 metr balandlikda va 100 metr masofadan 20ta o‘q uzgan va barcha o‘qlar nishonga aniq yetib borgan. O‘qlarning yarmi 11 santimetrli radiusga tekkan, bu inson boshiga teng nishondir.

Ma’lum qilinishicha, mutaxassislar aniqlikni kuchaytirish uchun maxsus dasturiy ta’minot ishlab chiqqan bo‘lib, u masofa, shamol tezligi va dronning qanday balandlikda ekanligiga qarab o‘q uzilish burchagini to‘g‘rilab turadi.