100 ming dollarlik kriptovaluta tovlamachiligi: Andijonda jinoiy guruh ushlandi

Andijon shahri va Oltinko‘l tumanida yashovchi, 1995, 1998 va 2002 yillarda tug‘ilgan 3 nafar shaxs Andijon tumanida istiqomat qiluvchi, 2004 yilda tug‘ilgan fuqaroga nisbatan tovlamachilik sodir etganlikda gumonlanmoqda.

Foto: Videodan kadr

Ma’lum qilinishicha, ular jabrlanuvchini avtomashinaga majburlab o‘tqazib, o‘zlarini go‘yoki huquqni muhofaza qiluvchi organ xodimlari sifatida tanishtirgan.

Shundan so‘ng, jinoiy guruh a’zolari tovlamachilik yo‘li bilan unga tegishli 100 ming AQSh dollari miqdoridagi kriptovalutalarni o‘zlashtirib olib, evaziga 160 ming qalbaki AQSh dollari bergan.

O‘tkazilgan tezkor tadbirlar davomida “soxta xodimlar” qo‘lga olinib, ularning noqonuniy harakatlariga chek qo‘yildi.

Hozirda mazkur holat yuzasidan Jinoyat kodeksining 165-moddasi 3-qismi “a” bandi hamda 176-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.