AQShda kuchli qor bo‘roni – fotosuratlar

AQShga «Fern» nomini olgan qor bo‘roni yopirildi. Avvaliga mamlakat janubi muzdek yomg‘ir va qor ostida qolgan. Qator shtatlarda qor qoplami balandligi 30 santimetr va undan ortiqroqqa yetgan. Keyin esa mamlakat markaziy va shimoli-sharqiy qismida – Kolorado, Illinoys, Indiana, Missuri, Nyu Jyersi, Nyu York va Pensilvaniyada ham kuchli qor yog‘gan. Nyu Yorkdagi Markaziy xiyobonga 35,5 santimetr qalinlikdagi qor tushgan – bu 1905 yildan buyon qayd etilgan kunlik rekord sanaladi, deya yozgan CNN shtat Milliy meteorologiya xizmati ma’lumotlariga tayanib.

200 milliondan ortiq amerikaliklarga ekstremal ob-havo haqidagi ogohlantirish yuborilgan. Qator shtatlarda muzlash oqibatida yiqilgan daraxtlar elektr uzatish liniyalarini shikastlagan. 25 yanvar tongiga kelib milliondan ortiq kishi svetsiz edi, deb xabar bergan CNN va Reuters elektr energiya o‘chirilishi bilan bog‘liq vaziyatni kuzatib boruvchi PowerOutage.us sayti ma’lumotlariga tayanib.

Nyu York gubernatori Keti Hochul Nyu York shahrida, Long-Aylendda va Gudzon vodiysida bo‘ron oqibatlarini bartaraf etishda yordam ko‘rsatish uchun Milliy gvardiya qo‘shinlari safarbar etilganini ma’lum qildi. Ko‘plab shtatlarda maktablar, bolalar bog‘chalari, jamoat kutubxonalari yopilgan. AQSh prezidenti Donald Tramp bo‘ronni «tarixiy» deb atagan va qator shtatlarda tabiiy ofat tufayli favqulodda holat e’lon qilinishini ma’qullagan.

Nyu York shahri meri Zoran Mamdani yakshanba kuni aholini uyda qolishga chaqirgan. «Shahrimizda kuchli qor yog‘moqda va men uyda qolish, uzoqroq uxlash yoki jamoat kutubxonasi taklifidan foydalanish uchun yaxshiroq sabab o‘ylab topa olmayapman: kitobxonlik chiptasiga ega bo‘lgan har bir kishi uchun elektron yoki audio kitob shaklidagi „Qaynoq raqobat“dan bepul foydalanish mumkin», – degan u.

Dam olish kunlarida butun mamlakat bo‘ylab 16 mingdan ortiq aviareys bekor qilingan va 20 mingga yaqini qoldirilgan. Flight Aware servisiga ko‘ra, aviakompaniyalar birgina 25 yanvarning o‘zida 12 ming atrofidagi reysni bekor qilishgan. CBS News bu koronavirus pandemiyasi haqida e’lon qilingan 2020 yil martidan buyon eng ko‘p reyslar bekor qilinishi bo‘lmoqda.

So‘nggi ma’lumotlarga ko‘ra, bo‘ron va uning oqibatlari tufayli kamida 14 kishi halok bo‘lgan. Tennessi, Kanzas, Nyu York, Texas, Luiziana va Michigan shtatlari rasmiylari noqulay ob-havo oqibatida ro‘y bergan o‘limlar haqida xabar qilgan.

Meteorologlar «Fern» bo‘ronini keng tarqalayotgani tufayli noyob bo‘ron deb atagan. «U Nyu Meksika va Texasdan Yangi Angliyaga qadar bo‘lgan hududlarni qamrab oldi – ya’ni gap taxminan 2000 milya (3200 kilometr atrofida) haqida ketmoqda», – deydi Milliy meteoxizmatlar meteorologi Ellison Santorelli.

Dushanba kuni ertalab ham Yangi Angliyaning shimoliy qismida, mamlakat shimoli-sharqida va Appalachi tog‘larining ba’zi hududlarida bo‘ron davom etayotgandi. CNN ma’lumotiga ko‘ra, 27 yanvarga o‘tar kechasigacha qor yog‘ishi kutilmoqda. Meteorologlar keyingi kunlarda «transport va infratuzilma uchun xavfli oqibatlar»ga olib kelishi mumkin bo‘lgan juda past harorat kuzatilishi kutilayotganidan ogohlantirgan.