Zelenskiy Ukraina 2027 yilgacha YeIga a’zo bo‘lishini talab qilmoqda

“Yevropa Ittifoqiga a’zolik — nafaqat biz, balki butun Yevropa uchun ham xavfsizlikning asosiy kafolatlaridan biri. Chunki Yevropaning umumiy kuchi, jumladan, Ukrainaning xavfsizlik, texnologiya va iqtisodiy hissasi tufayli ham mumkin”, — dedi Zelenskiy.

Ukraina rahbarining ta’kidlashicha, aynan shu sabab Kiyev YeIga tezroq a’zo bo‘lishni talab qilmoqda va bu yo‘lda sheriklar qo‘llab-quvvatlashiga umid qilmoqda.

Avstriya hukumati rahbari bilan muzokaralar chog‘ida Volodimir Zelenskiy Avstriyaga Ukraina energetika sektoriga ko‘rsatgan yordami uchun minnatdorlik bildirdi va Kristian Shtokkerni qariyb to‘rt yildirki Rossiyaning keng ko‘lamli bosqiniga qarshi kurashib kelayotgan Ukrainaga tashrif buyurishga taklif qildi.

“Rossiya har kuni ukrainlarni yorug‘lik va issiqliksiz qoldirish uchun energetikaga zarba beryapti, sheriklar bunga munosabat bildirishi juda muhim. Shuning uchun o‘tgan hafta Avstriya energetika sektorimizni qo‘llab-quvvatlash uchun mablag‘ ajratganini juda qadrlaymiz”, — dedi Zelenskiy.

Shuningdek, u Shtokkerga Abu-Dabida o‘tgan Ukraina, AQSh va Rossiya delegatsiyalari ishtirokidagi uch tomonlama uchrashuvlar mazmuni haqida ham ma’lumot bergan.

Hozircha Ukraina uchun YeIga tezlashtirilgan tarzda a’zo bo‘lish istiqboli mavjud emas. Ukraina — nomzod davlat va Yevrokomissiya mamlakatning asosiy islohot talablarini bajarishdagi taraqqiyotini tasdiqlamoqda. Biroq Vengriya vetosi sabab Kiyev haligacha YeIga kirish bo‘yicha rasmiy muzokaralarni boshlay olmayapti. A’zolik shartlari haqida norasmiy maslahatlashuvlar esa davom etmoqda.