Dron va yonkamerali tekshiruvlar: suvdan foydalanish monitoringi kuchaytiriladi

Suv resurslaridan oqilona foydalanishni ta’minlash maqsadida nazorat tizimi yanada kuchaytiriladi. Endilikda tekshiruvlar zamonaviy texnologiyalar - dron va yonkameralar orqali amalga oshiriladi.

Foto: Prezident matbuot xizmati

Suvdan foydalanish va suv tejovchi texnologiyalarning joriy etilishi ustidan davlat nazoratini takomillashtirish choralari belgilandi. Xususan, «Suvxo‘jaliknazorat» inspeksiyasi va uning hududiy bo‘linmalarida suv tejovchi texnologiyalar hamda suvdan foydalanishni monitoring qilish bo‘limlari tashkil etiladi.

Tadbirkorlik sub’yektlarida inspeksiya tomonidan o‘tkaziladigan tekshiruvlarni yonkameralardan foydalangan holda amalga oshirish tartibi joriy etiladi. Bu shaffoflikni ta’minlash va tekshiruv jarayonlarida inson omilini kamaytirishga xizmat qiladi.

Shuningdek, qishloq xo‘jaligi ekin maydonlarida suvdan foydalanish va suv isrofini monitoring qilish maqsadida uchuvchisiz uchish dronlaridan foydalanishga ruxsat beriladi. Bu esa katta hududlarni tezkor kuzatish, qoidabuzarliklarni aniqlash va suv resurslaridan samarali foydalanishni ta’minlash imkonini yaratadi.

Mazkur chora-tadbirlar suv resurslarini tejash va sohada hisobdorlikni oshirishga qaratilgan.