Olmaliqda o‘quvchi vafoti bo‘yicha surishtiruv ishlari olib borilmoqda

Ijtimoiy tarmoqlarda Olmaliq shahridagi maktab o‘quvchisining vafoti bilan bog‘liq turli xabarlar va muhokamalar tarqalmoqda. Mazkur holat yuzasidan rasmiy munosabat bildirilib, surishtiruv ishlari olib borilayotgani ma’lum qilindi.

Foto: Kun.uz

Ma’lumotlarga ko‘ra, joriy yilning 28 yanvar kuni Olmaliq shahridagi 5-sonli umumta’lim maktabida noxush holat yuz bergan. Maktabning 10-sinf o‘quvchisi (2009 yilda tug‘ilgan) K.Ye. maktab yo‘lagida hushini yo‘qotgan. Dastlabki tibbiy yordam ko‘rsatilganiga qaramay, o‘quvchi vafot etgan.

Ayni paytda huquq-tartibot organlari tomonidan hodisa yuzasidan surishtiruv ishlari olib borilmoqda. Yakuniy xulosalar rasmiy tekshiruvlar yakunlanganidan so‘ng e’lon qilinishi bildirildi.

Shu munosabat bilan jamoatchilikdan tekshiruv tugallanmaguncha tasdiqlanmagan ma’lumotlarni tarqatmaslik, xolislik va qonun ustuvorligi tamoyillariga rioya qilish so‘raldi.