Uchta hududda bojxona boshliqlari pensiyaga chiqarildi

Toshkent shahri va Samarqand viloyati bojxona boshqarmasi boshliqlari hamda Sirdaryo viloyati bojxona boshqarmasi boshlig‘ining birinchi o‘rinbosari pensiyaga kuzatildi. Avvalroq prezident tanqididan keyin prokuratura tizimida ham yoshi katta xodimlardan bir guruhi pensiyaga chiqarilgandi.

Toshkent shahar Bojxona boshqarmasi boshlig‘i Tolibjon Saidov lavozimini tark etdi, u pensiyaga kuzatilgan. Ushbu ma’lumotni Kun.uz manbasi tasdiqladi.

**Tolibjon Saidov 2020 yil sentabr oyidan buyon Toshkent shahar bojxona boshqarmasini boshqarib kelayotgan edi.**

Saidov bilan bir vaqtda Samarqand viloyati Bojxona boshqarmasi boshlig‘i Yoqub Mirzarahimov va Sirdaryo viloyati Bojxona boshqarmasi boshlig‘ining birinchi o‘rinbosari A.Inyaminov ham iste’foga chiqarilgan.

Manbaga ko‘ra, tez orada ularni ko‘p yillik faoliyatiga hurmat ko‘rsatgan holda pensiyaga kuzatish tadbiri o‘tkaziladi.

**Yoqub Mirzarahimov Samarqand viloyati Bojxona boshqarmasi boshlig‘i lavozimida 2020 yil noyabr oyidan beri ishlayotgandi.**

A.Inyaminov / Foto: Sirdaryo viloyati Bojxona boshqarmasi matbuot xizmati

Eslatib o‘tamiz, 27 yanvar kungi selektorda prezident Shavkat Mirziyoyev huquq-tartibot sohasiga yosh va talabchan rahbarlar korpusi kerakligini aytgandi. Shundan keyin, 7 fevral kuni prokuratura tizimida bir guruh xodimlar nafaqaga kuzatilgan edi.