O‘zbekiston va Qozog‘iston temiryo‘l tashuvlari hajmini oshiradi

Yuk tashuv hajmini oshirish maqsadida Sariog‘och, Oazis va Sirdaryo tutashuv punktlarida infratuzilmani rivojlantirish hamda Darboza-Maqtaral uchastkasini yakunlash bo‘yicha qo‘shma tadbirlar rejasi ishlab chiqilgan.

Foto: Qozog‘iston Respublikasi Transport vazirligi

O‘zbekiston va Qozog‘iston transport vazirlari temiryo‘l transporti sohasidagi hamkorlikni yanada rivojlantirish masalalarini muhokama qildilar.

Qayd etilishicha, 2025 yil yakunlariga ko‘ra, ikki mamlakat o‘rtasidagi temir yo‘l tashuvlari hajmi 32,3 million tonnani tashkil etdi, bu 2024 yildagiga nisbatan 16 foizga yuqori ko‘rsatkichdir.

Yuk tashuv hajmini oshirish maqsadida Sariog‘och, Oazis va Sirdaryo tutashuv punktlarida infratuzilmani rivojlantirish hamda Darboza—Maqtaral uchastkasini yakunlash bo‘yicha qo‘shma tadbirlar rejasi ishlab chiqilgan.

Ma’lumot uchun, hozirda Sariog‘och orqali sutkasiga 36 juft poyezd qatnamoqda va buni 40 tagacha oshirish rejalashtirilgan. Oazis orqali 2 juft poyezd harakatlanmoqda, uni 10gacha oshirish ko‘zda tutilgan. Darboza—Maqtaral uchastkasi ochilgach, Sirdaryo orqali 10 juftgacha poyezd qatnaydi.