Urushning birinchi kuni. Eron va Isroildan suratlar

AQSh va Isroil 28 fevral kuni ertalab Eronga qarshi harbiy amaliyot boshladi. Mamlakatdagi ko‘plab obektlarga, jumladan, oliy rahnamo oyatulloh Ali Xominaiyning Tehrondagi qarorgohiga raketa va bombalar orqali zarbalar berildi. Shuningdek, Keroj (Tehronning yadroviy va harbiy sanoatning muhim markazi bo‘lgan hudud), Isfaxon, Kirmonshoh, Tabriz va boshqa yirik shaharlarda zarbalar qayd etilgan.

Nafaqat harbiy obektlar, balki Eronning harbiy va siyosiy rahbarlari, jumladan, Ali Xominaiy, prezident Mas’ud Pizishkiyon va Islom inqilobi muhofizlari korpusi qo‘mondonlari Amerika va Isroil zarbalarining asosiy nishonlari sifatida belgilab olingan.

Dastlabki zarbalardan keyin AQSh prezidenti Donald Tramp videomurojaat qilib, Eron kuchlarini qurollarni tashlashga chorladi va aks holda ularni muqarrar o‘lim kutishidan ogohlantirdi. U Eron xalqiga ham murojaat qilib, hujumlar tugagunicha boshpanalarda qolishga, keyin esa «hokimiyatni qo‘lga olish»ga chaqirdi.

Isroil bosh vaziri Binyamin Netanyahu Isroil harakatlarining asosiy maqsadi – Eronda yadroviy qurol paydo bo‘lishiga yo‘l qo‘ymaslik ekanini aytdi va bu amaliyot yakunida «mard Eron xalqi o‘z taqdirining egasi bo‘lishi uchun shart-sharoit yaratilishi»ni ma’lum qildi.

Eron hukumati «vayronkor» javob qaytarish bilan tahdid qildi – va Isroil hududi bo‘ylab zarbalar yo‘lladi (mamlakatda favqulodda holat e’lon qilindi), ko‘p o‘tmay AQShning mintaqadagi harbiy bazalari ham o‘qqa tutildi. Quyida 28 fevral kuni Tehronda va Isroil hududlarida olingan fotosuratlar keltiriladi.

Isroil

Eronga berilgan zarbalar bilan bir vaqtda Isroil Livan janubidagi «Hizbulloh» harakati pozitsiyalariga bir nechta zarbalar berdi. «Hizbulloh» Eronning eng yaqin ittifoqchisi bo‘lib, u Isroilga hujum qilishga urinishidan xavotirlar bor edi. Eronning yana bir proksi guruhi – Yamandagi husiychilari esa Isroilni o‘qqa tutishni va Qizil dengizda kemalar qatnovini bloklay boshlashini e’lon qilgan.

Isroilda favqulodda holat e’lon qilingan, maktablar, bolalar bog‘chalari, davlat muassasalari yopildi, ko‘ngilochar tadbirlar bekor qilindi. Isroil mudofaa kuchlari zaxiradagi 70 ming askar safarbar qilinganini e’lon qildi.

Eronga hujum boshlanganidan taxminan uch soat o‘tgach, Tehron javob harakatlarini amalga oshirdi. Raketalar Isroilga, shuningdek, Kuvayt, Qatar, Bahrayn va BAAdagi Amerika harbiy bazalariga uchirilgan. AQShning mintaqadagi ittifoqchilari ham Eron zarbalariga uchradi – Saudiya Arabistoni poytaxti Ar-Riyodda ham havo trevogasi faollashtirildi, holbuki qirollik avvalroq AQShga o‘z havo hududidan Eronga hujum qilish uchun foydalanishga ruxsat bermasligini ma’lum qilgandi.

Eron va Isroil, shuningdek, Fors ko‘rfazidagi qator mamlakatlar o‘z havo kengliklarini yopishgan.