Hindistonda o‘zbekistonlik ayol YTH oqibatida halok bo‘ldi

10 mart kuni Hindistonning Panjob shtati Zirakpur shahrida yuz bergan yo‘l-transport hodisasi oqibatida T.M. ismli O‘zbekiston fuqarosi halok bo‘lgan.

O‘zbekiston elchixonasi ma’lumotiga ko‘ra, hodisa shaxsiy transport vositasi ishtirokida sodir bo‘lgan. Panjob shtatining vakolatli huquqni muhofaza qilish organlari aybdorlarni javobgarlikka tortish maqsadida tegishli tergov-surishtiruv ishlarini amalga oshirmoqda.

O‘zbekiston elchixonasi marhumaning qarindoshlari bilan muntazam aloqada bo‘lib turibdi hamda ularga zarur konsullik-huquqiy yordam ko‘rsatmoqda. Shuningdek, yo‘l-transport hodisasi bo‘yicha tergov jarayoni nazoratga olingan.

Diplomatik vakolatxona T.M.ning yaqinlari va qarindoshlariga hamdardlik bildirdi hamda marhumaning jasadini vatanga qaytarish bo‘yicha zarur chora-tadbirlarni amalga oshirdi.

O‘zbekiston elchixonasi Hindiston hududida murakkab hayotiy vaziyatlarga tushib qolgan fuqarolarga har tomonlama konsullik, huquqiy va boshqa yordamni tezkorlik bilan ko‘rsatishga to‘liq tayyorligini bildirgan.