Bokuda fransiyalik shaxs josuslik aybi bilan 10 yilga hukm qilindi

Bokudagi sud fransiyalik tadbirkor Martin Rayanni 10 yil muddatga ozodlikdan mahrum qildi. 16 mart, dushanba kuni u «josuslik» ishi bo‘yicha aybdor deb topildi, deb xabar bermoqda AFP va Reuters. U Bokuning Turkiya va Pokiston bilan harbiy hamkorligi haqida maxfiy ma’lumotlarni to‘plaganlikda ayblanmoqda.

Rayanning ehtimoliy sherigi sifatida ko‘rilgan Ozarboyjon fuqarosi Azad Mamedli esa «davlatga xiyonat» aybi bilan 12 yillik qamoq jazosiga hukm qilindi. Sud muhokamasi 2025 yil yanvaridan buyon davom etayotgan edi. Har ikki ayblanuvchi ham o‘z aybini tan olmadi.

Mercorama kompaniyasining bosh direktori Martin Rayan 2023 yil dekabrida qo‘lga olingan. Ish materiallarida aytilishicha, u Fransiya diplomatlari bilan uchrashib turgan, ammo ular amalda maxsus xizmat xodimlari bo‘lgani iddao qilingan, shuningdek u ularni Mamedli bilan tanishtirgan.

Rayanning aytishicha, u 2015 yilda Ozarboyjonga kelgan va shundan buyon Fransiya diplomatik missiyasining ayrim xodimlari bilan tanishgan. Tadbirkorning suddagi bayonotlariga tayanib yozilishicha, ular turli mavzularni muhokama qilgan bo‘lsa-da, u hech qachon elchixona xodimlaridan pul olmagan va moliyaviy manfaatni ko‘zlamagan. Oxu nashri ma’lumotiga ko‘ra, Rayan Tog‘li Qorabog‘ mojarosi davrida Ozarboyjon armiyasining qurollanishi va shaxsiy tarkib bilan ta’minlanishi haqida ma’lumot to‘plaganlikda ayblangan.

AFP qayd etishicha, tadbirkorning qo‘lga olinishi Parij va Boku o‘rtasida jiddiy diplomatik taranglik hukm surayotgan bir paytda yuz bergan. Ozarboyjon prezidenti Ilhom Aliyev 2023 yilda Fransiyani Armanistonga fransuz qurollarini yetkazib berish orqali Kavkazda yangi urushni qo‘zg‘atishda ayblagan edi. Parijda esa Boku Yerevanga tahdid solayotgani aytilgan.

Shu munosabat bilan Ozarboyjon fransuz diplomatlarini mamlakatdan chiqarib yubordi, ortidan Parij ham xuddi shunday chora ko‘rdi. Fransiya Tashqi ishlar vazirligi Rayanning hibsga olinishini «o‘zboshimchalik» deb atadi va uni ozod qilishga chaqirdi, ammo bu urinishlar samara bermadi.