AI va bolalar: Xitoy xavfli texnologiyalarga chek qo‘ymoqda

Yangi qoidalarga ko‘ra, internetdagi barcha virtual insonlar yoki AI-avatarlar aniq belgilab qo‘yilishi shart. Bu orqali foydalanuvchilar real inson bilan emas, sun’iy intellekt bilan muloqot qilayotganini tushunishi kerak.

Shuningdek, 18 yoshgacha bo‘lganlar uchun “virtual yaqin munosabatlar”ni taqlid qiluvchi xizmatlar taqiqlanishi rejalashtirilmoqda. Bu chora bolalarda AI’ga emotsional bog‘lanish va qaramlikni oldini olishga qaratilgan.

Qoidalarda yana bir muhim talab — insonning shaxsiy ma’lumotlaridan uning roziligisiz “raqamli nusxa” yaratish taqiqlanadi. Shu bilan birga, AI texnologiyalaridan shaxsni tasdiqlash tizimlarini chetlab o‘tish uchun foydalanish ham man etiladi.

Bundan tashqari, sun’iy intellekt orqali tarqatiladigan kontent ham qat’iy nazoratga olinadi. Milliy xavfsizlikka tahdid soluvchi, zo‘ravonlik yoki nafratni targ‘ib qiluvchi materiallar taqiqlanadi. Platformalar esa foydalanuvchilarda ruhiy muammolar yoki o‘zini zararlash alomatlari kuzatilsa, aralashishi va yordam ko‘rsatishi kerak bo‘ladi.

Mutaxassislarga ko‘ra, bu qadam Xitoyning sun’iy intellektni keng joriy qilish bilan birga uni qattiq nazorat ostida saqlash siyosatini aks ettiradi. Mamlakat yaqinda qabul qilgan besh yillik strategiyasida AI iqtisodiyotning asosiy drayverlaridan biri sifatida belgilangan.

Yangi qoidalar hozircha jamoatchilik muhokamasiga qo‘yilgan bo‘lib, ular 6 maygacha taklif va fikrlar uchun ochiq qoladi.