Dog‘istonda suv toshqinlari oqibatida 4 kishi halok bo‘ldi

5 aprel kuni Dog‘istonning Derbent rayonida kuchli yog‘ingarchilik ortidan Gedjuxskoye suv omborida suv sathi ko‘tarilib, uning to‘g‘oni buzilib ketdi. Natijada Mamedkala posyolkasini suv bosgan.

Derbent rayoni hokimi Elman Ollohverdiyev 5 aprel kuni kechqurun daryodan bir necha kishini qutqarishga muvaffaq bo‘lingani haqida xabar berdi. «Kavkaz» federal avtoyo‘lining Kala aholi punktidagi ko‘prigi qulaganida ichida odamlari bo‘lgan avtomobillar oqib ketgandi.

Rayonning to‘rtta mikrorayoni hududida to‘rt ming kishi evakuatsiya qilingan, lekin barchani ham qutqarishning imkoni bo‘lmagan.

«Afsuski, homilador ayol va voyaga yetmagan o‘smirni qutqarib qolishning iloji bo‘lmadi», – deydi TASS agentligi suhbatdoshi.

Shu kuni Kirki qishlog‘ida ham yer o‘pirilishi tufayli uy qulashi oqibatida yana bir ayol halok bo‘lgan.

6 aprel kuni Mamedkala qishlog‘ida besh yoshli qiz jasadi topildi va jami qurbonlar soni to‘rt nafarga yetdi.

Bundan tashqari, ikki kishi bedarak yo‘qolgan deb hisoblanmoqda.