Zelenskiy Putinga yana energetik sulh taklif qildi

Ukraina prezidenti Volodimir Zelenskiy Kremlga energetika obektlariga o‘zaro zarbalarni to‘xtatishni taklif qildi. “Agar Rossiya bizning energetika obektlarimizga hujumlarni to‘xtatishga tayyor bo‘lsa, biz ham ularga xuddi shunday tarzda javob qaytarishga tayyormiz”, — deyiladi Ukraina prezidenti saytida dushanba, 6 aprel kuni e’lon qilingan bayonotda. Unda, shuningdek, Rossiya tomoni bu taklifni AQSh vakillaridan allaqachon olgani ham qayd etilgan.

Ukraina rahbari o‘tgan tun Odessadagi energetika infratuzilmasi va turar joy binolariga Rossiya dronlari tomonidan berilgan zarbalarni esladi. Ushbu hujum oqibatida uch kishi halok bo‘lgan.

“Biz Rossiyaga hech bo‘lmaganda Pasxa paytida — yilning shu alohida davrida — o‘t ochishni to‘xtatishni bir necha bor taklif qildik. Ammo ular uchun barcha vaqt bir xil, ular uchun muqaddas hech narsa yo‘q. Va agar Rossiya urush olib borishga, uni moliyalashtirishga qodir bo‘lsa — Rossiyaning o‘zi tinchlikka o‘tishni istamaydi”, — dedi Zelenskiy va Kiyev ittifoqchilarini Moskvaga bosimni davom ettirishga chaqirdi.

30 mart kuni Ukraina prezidenti Kiyev Pasxa arafasida, ya’ni 12 aprel kuni nishonlanadigan davrda, energetik sulhni muhokama qilishga tayyor ekanini aytgan edi. “Biz, esingizda bo‘lsa, har qanday o‘t ochishni to‘xtatish masalasini muhokama qilishga tayyormiz. To‘liq o‘t ochishni to‘xtatishni ham”, — degan edi u o‘shanda.

Kreml esa bu taklifni rad etdi, chunki unda “sulh bo‘yicha aniq shakllantirilgan tashabbus”ni “ko‘rmaganini” ma’lum qildi. Bu haqda Rossiya prezidenti matbuot kotibi Dmitriy Peskov bayonot bergan.