Зеленский Путинга яна энергетик сулҳ таклиф қилди

Украина президенти Володимир Зеленский Кремлга энергетика объектларига ўзаро зарбаларни тўхтатишни таклиф қилди. “Агар Россия бизнинг энергетика объектларимизга ҳужумларни тўхтатишга тайёр бўлса, биз ҳам уларга худди шундай тарзда жавоб қайтаришга тайёрмиз”, — дейилади Украина президенти сайтида душанба, 6 апрел куни эълон қилинган баёнотда. Унда, шунингдек, Россия томони бу таклифни АҚШ вакилларидан аллақачон олгани ҳам қайд этилган.

Украина раҳбари ўтган тун Одессадаги энергетика инфратузилмаси ва турар жой биноларига Россия дронлари томонидан берилган зарбаларни эслади. Ушбу ҳужум оқибатида уч киши ҳалок бўлган.

“Биз Россияга ҳеч бўлмаганда Пасха пайтида — йилнинг шу алоҳида даврида — ўт очишни тўхтатишни бир неча бор таклиф қилдик. Аммо улар учун барча вақт бир хил, улар учун муқаддас ҳеч нарса йўқ. Ва агар Россия уруш олиб боришга, уни молиялаштиришга қодир бўлса — Россиянинг ўзи тинчликка ўтишни истамайди”, — деди Зеленский ва Киев иттифоқчиларини Москвага босимни давом эттиришга чақирди.

30 март куни Украина президенти Киев Пасха арафасида, яъни 12 апрел куни нишонланадиган даврда, энергетик сулҳни муҳокама қилишга тайёр эканини айтган эди. “Биз, эсингизда бўлса, ҳар қандай ўт очишни тўхтатиш масаласини муҳокама қилишга тайёрмиз. Тўлиқ ўт очишни тўхтатишни ҳам”, — деган эди у ўшанда.

Кремл эса бу таклифни рад этди, чунки унда “сулҳ бўйича аниқ шакллантирилган ташаббус”ни “кўрмаганини” маълум қилди. Бу ҳақда Россия президенти матбуот котиби Дмитрий Песков баёнот берган.