Saudiyaning bir kilometrlik minorasi qurilishi 100-qavatga yetdi

Saudiya Arabistonida qurilayotgan Jeddah Tower osmono‘par binosi 100-qavat marrasiga yetdi. Shu tariqa u dunyodagi balandligi bir kilometrga yetadigan ilk bino maqomi sari yana bir muhim qadam tashladi. Loyihani 2028 yilda yakunlash rejalashtirilgan.

Foto: AP

Qizil dengiz sohili bo‘ylab joylashgan shahar manzarasi tez o‘zgarmoqda: osmono‘par bino rasman muhim bosqichni bosib o‘tib, 100-qavatga yetdi. Manbalarga ko‘ra, ushbu bosqich 2026 yil 14 aprel kuni qayd etilgan. Bu esa dunyodagi birinchi “kilometrlik” bino haqidagi g‘oya endi olis orzu emas, balki muhandislik salohiyati va aniq muvofiqlashtirilgan ishlar asosida amalga oshayotgan voqelikka aylanayotganini ko‘rsatadi.

Avval Kingdom Tower nomi bilan tanilgan ushbu loyiha 2018 yilda to‘xtab qolganidan so‘ng, 2025 yil yanvarda to‘liq miqyosdagi qurilish ishlarini qayta tikladi. Shundan beri maydonda ishlar ancha jadallashgan.

Jeddah Tower yirik Jeddah Economic City loyihasining markaziy qismi hisoblanadi. Ushbu majmua Saudiya Arabistonini xalqaro biznes va nufuzli turizm markazlaridan biriga aylantirishga qaratilgan.

Loyiha Adrian Smith + Gordon Gill me’morlik byurosi tomonidan ishlab chiqilgan. Bu byuro, shuningdek, Dubaydagi Burj Khalifa osmono‘par binosi mualliflari sifatida ham tanilgan. Inshootning yakuniy balandligi kamida 1000 metr bo‘lishi kutilmoqda. Hozirda esa minoraning balandligi 402 metrga yetgani aytilmoqda.

Qurilishni 2028 yilda, ayrim manbalarga ko‘ra esa avgust oyida yakunlash rejalashtirilgan. Loyiha Saudiya Arabistonining Vision 2030 dasturidagi muhim tashabbuslardan biri sifatida ko‘riladi va mamlakatning iqtisodiy diversifikatsiya hamda texnologik rivojlanishga intilishini ifodalaydi.