Fillar to‘dasi amerikalik millioner-ovchini toptab o‘ldirdi

Millioner va uning hamrohi o‘rmonda ov qilish chog‘ida beshta fil va fil bolasiga duch kelgan. Ularning qo‘lidagi qurollarni ko‘rgan fillar darhol hujumga o‘tgan.

Foto: Bobby Hansen Hunting Safaris

Gabonda fillar to‘dasi amerikalik millionerni ov qilayotgan vaqtida toptab o‘ldirdi, deb xabar berdi Daily Mail gazetasi Collect Africa sayohat kompaniyasiga tayanib.

"Afrikada beshta fil antilopa ovlayotgan amerikalik millionerni toptab o‘ldirdi", — deyiladi nashr xabarida.

Xabarda aytilishicha, halok bo‘lgan millioner Kaliforniyada tokzoriga ega bo‘lgan 76 yoshli Erni Dozio bo‘lib, u o‘nlab yillardan buyon Afrika va Amerikada ekzotik jonivorlarni ovlash bilan shug‘ullanib kelgan.

Dozio va uning hamrohi o‘rmonda ov qilish chog‘ida beshta fil va fil bolasiga duch kelgan. Ularning qo‘lidagi qurollarni ko‘rgan fillar darhol hujumga o‘tgan.

Hujum oqibatida millioner halok bo‘lgan, hamrohi esa jarohatlangan, deb yozadi gazeta Dozio bilan tanish bo‘lgan keyptaunlik sobiq ovchining so‘zlariga asoslanib.