Afrikadagi eng baland osmono‘par bino qurilishi yakunlanmoqda

76 qavatli mazkur osmono‘par binogacha Afrikadagi eng baland inshoot maqomi 400 metrli Iconic Tower’ga tegishli edi. Tower F’ning asosiy qismi 333 metr balandlikka ega bo‘lsa, shpili bilan umumiy balandligi 421 metrga yetadi.

Imorat Abidjandagi mavjud A–E ma’muriy majmuasiga qo‘shimcha sifatida qurilmoqda. Loyiha davlat idoralarini bir joyga jamlash va binolar ijarasi xarajatlarini kamaytirish maqsadida ishlab chiqilgan.

Bino loyihasi mashhur arxitektor Pierre Fakhoury tomonidan tayyorlangan. U osmono‘par binoga an’anaviy Afrika niqobini eslatuvchi shakl bergan.

Bino tepasida “fonar” deb ataluvchi oynavand kuzatuv maydonchasi joylashadi. U asosiy tomdan taxminan 30 metr yuqorida bo‘ladi va shahar hamda Ebriye lagunasi manzarasini tomosha qilish imkonini beradi. Maydoncha barcha uchun ochiq bo‘ladi va unga maxsus panoramali lift orqali chiqiladi.

Tower F qurilishi muhandislar uchun katta sinov bo‘lgan. Bino noturg‘un grunt ustida qurilmoqda va uning umumiy og‘irligi 170 ming tonnaga yetadi. Shu sababli muhandislar yer ostiga uzunligi 60–70 metr bo‘lgan 70 ta po‘lat tayanch o‘rnatgan.

Inshootning ichki maydoni qariyb 140 ming kvadrat metrni tashkil etadi. Unda davlat idoralari, konferensiya zallari, restoranlar, auditoriyalar va yerosti avtoturargohlari joylashadi. Bino ichida 21 ta yo‘lovchi lifti va ikki yuk lifti ishlaydi.

Fasad ikki qavatli texnologiya asosida qurilgani sababli Tower F EDGE ekologik sertifikatini olgan. Tashqi qism 16 mingta shisha paneldan iborat bo‘lib, quyosh nurlarini qaytarish va binoda issiqlikni kamaytirishga xizmat qiladi.

Qizig‘i shundaki, Tower F qurilishi haqidagi dastlabki g‘oyalar hali 1970-yillarda paydo bo‘lgan. Oradan o‘nlab yillar o‘tib, loyiha endi amalga oshish arafasiga keldi.

Mutaxassislar fikricha, Tower F nafaqat ma’muriy markaz, balki Afrikaning yangi arxitektura ramziga aylanishi mumkin.