Chegara hududida milliardlab so‘mlik noqonuniy dorilar topildi

Farg‘ona viloyatidagi “o‘zbek-qirg‘iz” davlat chegarasi orqali olib o‘tilmoqchi bo‘lgan 3 milliard so‘mdan ortiq qiymatga ega kuchli ta’sir qiluvchi dori vositalari aniqlandi. Holat yuzasidan jinoyat ishi qo‘zg‘atildi.

Foto: Videodan kadr

Davlat xavfsizlik xizmati Chegara qo‘shinlari harbiy xizmatchilari tomonidan davlat chegarasini qo‘riqlash va uning daxlsizligini ta’minlashga qaratilgan tezkor-profilaktik tadbirlar davomida giyohvandlik vositalari kontrabandasi bilan bog‘liq holat fosh etildi.

Xususan, “o‘zbek-qirg‘iz” davlat chegarasining Farg‘ona tumani hududidan o‘tuvchi qismida noma’lum shaxslar tomonidan qo‘shni respublikadan kontrabanda yo‘li bilan olib kirilib, tashlab ketilgan 3 ta qop aniqlangan.

Tekshiruv jarayonida ushbu qoplar ichida umumiy qiymati 3 milliard 297 million so‘m bo‘lgan 30 ming 660 dona “Regapen” hamda 925 dona “Tropikamid” kuchli ta’sir qiluvchi dori vositalari borligi ma’lum bo‘ldi.

Mazkur holat yuzasidan Jinoyat kodeksining 246-moddasi 1-qismi (kontrabanda) va 251¹-moddasi 5-qismi bilan jinoyat ishi qo‘zg‘atilgan.

Hozirda ushbu noqonuniy yuklarning egalarini aniqlash va qo‘lga olish bo‘yicha tezkor-qidiruv tadbirlari olib borilmoqda.