Yevropada noodatiy jazirama kuzatilmoqda – suratlar

Yevropa Afrikadan kirib kelgan ekstremal issiqlikni boshdan kechirmoqda.

So‘nggi hafta davomida G‘arbiy Yevropa aholisi anomal issiqning navbatdagi to‘lqinini boshdan kechirdi. Aksar hududlarda havo harorati 30 darajadan yuqori bo‘lgan, ayrim joylarda 40 darajadan ham oshgan.

Xususan, Buyuk Britaniyada iyun oyi uchun rekord darajadagi yuqori harorat qayd etildi, Ispaniya va Fransiya uchun esa 23 va 24 iyun kunlari kuzatuvlar tarixidagi eng issiq kunlarga aylandi.

Fransiyada bir haftaga yaqin vaqt ichida 40 dan ortiq kishi cho‘kib ketgan. Umuman, bu kunlarda mamlakatda 1000 ta ortiqcha o‘lim holati qayd etilgan. O‘lim holatlarining aksari 65 yoshdan katta kishilar hissasiga to‘g‘ri kelmoqda. Qariyalar uylari va shifoxonalardan qo‘shimcha ma’lumotlar kelishi hisobiga bu raqamlar yanada oshishi kutilmoqda.

Italiya, Germaniya va Shveytsariyada yuqori harorat tufayli xavf haqida ogohlantirishlar berilmoqda. Bir qancha mamlakatlarda transport faoliyati izdan chiqqan, ochiq havodagi tadbirlar hamda maktablardagi mashg‘ulotlar bekor qilinmoqda.

Hozirda issiq havo sharq tomon harakatlanmoqda. Prognozlarga ko‘ra, keyingi ikki hafta mobaynida issiq havo Yevropaning markaziy qismi va Bolqon mamlakatlariga ham tarqalishi kutilmoqda.