Европада ноодатий жазирама кузатилмоқда – суратлар

Европа Африкадан кириб келган экстремал иссиқликни бошдан кечирмоқда.

Сўнгги ҳафта давомида Ғарбий Европа аҳолиси аномал иссиқнинг навбатдаги тўлқинини бошдан кечирди. Аксар ҳудудларда ҳаво ҳарорати 30 даражадан юқори бўлган, айрим жойларда 40 даражадан ҳам ошган.

Хусусан, Буюк Британияда июн ойи учун рекорд даражадаги юқори ҳарорат қайд этилди, Испания ва Франция учун эса 23 ва 24 июн кунлари кузатувлар тарихидаги энг иссиқ кунларга айланди.

Францияда бир ҳафтага яқин вақт ичида 40 дан ортиқ киши чўкиб кетган. Умуман, бу кунларда мамлакатда 1000 та ортиқча ўлим ҳолати қайд этилган. Ўлим ҳолатларининг аксари 65 ёшдан катта кишилар ҳиссасига тўғри келмоқда. Қариялар уйлари ва шифохоналардан қўшимча маълумотлар келиши ҳисобига бу рақамлар янада ошиши кутилмоқда.

Италия, Германия ва Швейцарияда юқори ҳарорат туфайли хавф ҳақида огоҳлантиришлар берилмоқда. Бир қанча мамлакатларда транспорт фаолияти издан чиққан, очиқ ҳаводаги тадбирлар ҳамда мактаблардаги машғулотлар бекор қилинмоқда.

Ҳозирда иссиқ ҳаво шарқ томон ҳаракатланмоқда. Прогнозларга кўра, кейинги икки ҳафта мобайнида иссиқ ҳаво Европанинг марказий қисми ва Болқон мамлакатларига ҳам тарқалиши кутилмоқда.