Fransiyada Shengen vizasi olish tartibi o‘zgardi

Rossiya turoperatorlari assotsiatsiyasi ma’lum qilishicha, Fransiya oxirgi kunlarda rossiyaliklar uchun viza tartibini kuchaytirgan Yevropa Ittifoqining to‘rtinchi davlatiga aylandi. Bundan avval Italiya, Ispaniya va Vengriya ham shunga o‘xshash cheklovlarni joriy etgan edi.

Yangi tartibga muvofiq, 15 iyuldan boshlab Moskvadagi Fransiya viza markazi Shengen vizasi uchun hujjatlarni notarial ishonchnoma asosida qabul qilmaydi.

Endilikda hujjatlarni oldindan ro‘yxatdan o‘tgan holda faqat vizani rasmiylashtirayotgan shaxsning o‘zi, 18 yoshga to‘lmagan bolalar nomidan ularning ota-onasi yoki qonuniy vasiysi, shuningdek turmush o‘rtog‘i, farzandlari va ota-onasi topshirishi mumkin.

Yaqin qarindoshlar orqali murojaat qilinganda qarindoshlikni tasdiqlovchi hujjatlarning asl nusxasi taqdim etilishi shart. Shu bilan birga, ariza beruvchi so‘nggi 59 oy ichida biometrik ma’lumotlarini topshirgan bo‘lishi lozim.

Shuningdek, viza anketaci ariza beruvchining o‘zi tomonidan imzolanishi majburiy hisoblanadi. 12 yoshdan katta barcha murojaatchilar uchun biometrik ma’lumotlarni topshirish talabi saqlanib qoladi.

Avvalroq Italiyaning Moskvadagi viza markazida murojaatlar soni keskin oshgani sababli Shengen vizasini rasmiylashtirish muddati 60 kungacha, Ispaniyada esa 45 kungacha uzaygani xabar qilingan edi. Vengriya esa Rossiyaning Samara, Ufa va Qozon shaharlarida viza arizalarini qabul qilishni vaqtincha to‘xtatgan.