Shayxontohurda ikki qavatli do‘konda yong‘in sodir bo‘ldi

Toshkent shahrining Shayxontohur tumanida joylashgan ikki qavatli do‘konda yong‘in sodir bo‘ldi. Hodisa tezkorlik bilan bartaraf etildi, oqibatda jabrlanganlar qayd etilmadi.

Foto: Favqulodda vaziyatlar vazirligi

Favqulodda vaziyatlar xizmati ma’lumotiga ko‘ra, 5 iyul kuni soat 21:15 da Toshkent shahar Shayxontohur tumani Beshqo‘rg‘on ko‘chasida joylashgan ikki qavatli do‘konning ikkinchi qavatida yong‘in sodir bo‘layotgani haqida xabar kelib tushgan.

Xabarga asosan, yong‘in-qutqaruv ekipajlari voqea joyiga soat 21:24 da yetib borgan va yong‘in soat 21:34 da to‘liq o‘chirilgan.

Dastlabki ma’lumotlarga ko‘ra, yong‘in natijasida do‘konning ikkinchi qavati ichki qismidagi 30 kvadrat metr maydon yonib zararlangan.

Hodisa oqibatida tan jarohati olganlar yo‘q. Ayni paytda yong‘inning kelib chiqish sabablari va yetkazilgan moddiy zarar miqdoriga aniqlik kiritilmoqda.