Anomal issiq sabab butun respublika bo‘ylab bog‘chalar yopilishi mumkin

O‘zbekistonda kuzatilayotgan anomal issiq tufayli davlat maktabgacha ta’lim tashkilotlari faoliyatini vaqtincha to‘xtatish masalasi ko‘rib chiqilmoqda. Bu haqda Kun.uz'ga Maktabgacha va maktab ta’limi vazirligi ma’lum qildi.

Bu borada hokimliklar, Sanitariya-epidemiologiya qo‘mitasi hamda «O‘zgidromet» bilan hamkorlik yo‘lga qo‘yilgan.

Qayd etilishicha, qaror respublika bo‘yicha yagona tartibda emas, balki har bir hududdagi ob-havo va sanitariya-epidemiologik vaziyatdan kelib chiqqan holda qabul qilinadi.

«Har bir hududdagi vaziyat alohida o‘rganilmoqda. Zarurat tug‘ilgan taqdirda maktabgacha ta’lim tashkilotlari faoliyati vaqtincha to‘xtatilishi mumkin», – deyiladi vazirlik ma’lumotida.

Eslatib o‘tamiz, avvalroq anomal issiq sabab Qoraqalpog‘iston Respublikasidagi davlat va nodavlat maktabgacha ta’lim tashkilotlari faoliyati ham vaqtincha to‘xtatilgan edi. U yerda mazkur qaror mahalliy hokimliklar tomonidan Sanitariya-epidemiologiya xizmati xulosalari asosida qabul qilingan.