Жиззах вилояти маҳаллаларида муносиб раислар сайланмоқда

Ўзбекистон Республикаси Олий Мажлиси Сенати Кенгашининг жорий йил 5 мартдаги “Фуқаролар йиғинлари раислари (оқсоқоллари) ва уларнинг маслаҳатчилари сайловига тайёргарлик кўриш ҳамда уни ўтказиш тўғрисида”ги қарорига мувофиқ, Жиззах вилоятида ҳам фуқаролар йиғинлари раислари ва уларнинг маслаҳатчилари сайлови юксак савияда ўтказилмоқда.

Сайловга пухта тараддуд кўрилди. Сайловни ташкил этиш ва ўтказишга кўмаклашувчи вилоят, туман ва шаҳар комиссиялари, ишчи гуруҳлар томонидан аҳоли ўртасида тушунтириш-тарғибот ишлари олиб борилди. Маҳалла фуқаролар йиғини раиси ва унинг маслаҳатчилари лавозимига обрў-эътиборли, фаол ва ташаббускор номзодлар кўрсатилди. Ҳар бир кўча, қишлоқдан вакиллар йиғилишида иштирок этувчилар рўйхати шакллантирилди.

Жиззах шаҳридаги “Учариқ” маҳалла фуқаролар йиғини раиси ва унинг маслаҳатчилари сайлови ҳам демократик тамойиллар асосида юксак савияда ўтказилди.

– Президентимиз раҳнамолигида маҳалланинг ижтимоий мавқеини юксалтириш, ваколатлари доирасини кенгайтириш борасида амалга оширилаётган изчил ислоҳотлар юксак самаралар бермоқда, – дейди меҳнат фахрийси Умарқул Қобилов. – Ўзбекистон Республикасининг “Фуқароларнинг ўзини ўзи бошқариш органлари тўғрисида”ги қонунига киритилган янги ҳуқуқий меъёрлар фуқаролар йиғинлари фаолиятини такомиллаштириб, уларнинг ижтимоий, иқтисодий, ҳуқуқий, маънавий-маърифий соҳалардаги ваколат ва вазифаларни бажаришдаги масъулиятини янада оширди. Эндиликда маҳалла фуқаролар йиғини илгари давлат ваколатига кирган ёш авлод тарбиясидан то ҳудудни ижтимоий-иқтисодий ривожлантиришгача бўлган барча вазифаларни муваффақиятли амалга оширмоқда.

Вакиллар маҳалла раислигига номзодлар дастури билан танишиб, уларнинг ташкилотчилик, ташаббускорлик фазилатларига алоҳида эътибор қаратди. Қосимжон Оқилов “Учариқ” маҳалла фуқаролар йиғини раиси, маслаҳатчилар лавозимига кўрсатилган номзодлар орасидан 7 нафари очиқ овоз бериш йўли билан маслаҳатчи этиб сайланди.