Жиззахда юк машинаси ёниб кетди

Бу сўнгги 20 кунда йўлларда юк машинаси ёниши билан боғлиқ учинчи ҳолат.

Ғаллаорол туманида юк машинаси ёниб кетди. Жиззах вилояти ФВБ ёнғин тўғрисида маълумот берди.

Маълум қилинишича, ҳодиса бугун тонгда М-39 халқаро автомобил йўлида содир бўлган.

Жиззах вилояти ФВБга “Самарқанд-Тошкент” йўналишида ҳаракатланиб кетаётган юк машинасида ёнғин содир бўлаётганлиги тўғрисида хабар келиб тушган. 2 та ёнғин-қутқарув экипажи воқеа жойига етиб бориб, ярим соатдан кўпроқ вақтда ёнғинни ўчиришган.

Ҳодиса оқибатида тан жароҳати олганлар йўқлиги билдирилди. Ҳозирда ёнғин сабаби ва зарари аниқланмоқда.

Бу сўнгги 20 кунда йўлларда юк машинаси ёниши билан боғлиқ учинчи ҳолат: 16 май куни Самарқандда ҳамда Пискентда юк машиналари ёниб кетганди.